जबसे राजा बनल भकचोन्हरा
___________________________
खाटी डकइत भगवान हो गयल
लतमरुआ परधान हो गयल
हमरे गांव के भुच्चड़ गदहा
बिन पढ़ले कपतान हो गयल
जबसे राजा बनल भकचोन्हरा
कउआ से दीवान हो गयल।
आपन इज्जत अपने हाथे
बहुत मरायल लाते-लाते
घुन पिसाइल गेहूं के साथे
बजर छिनरा सिरिमान हो गयल
जबसे राजा बनल भकचोन्हरा
कउआ से दीवान हो गयल।
पूत जनमले लोलक लइया
धान पछोरे निकले पइया
रोवे बहिन अ बाबू मइया
लड़िका त बेईमान हो गयल
जबसे राजा बनल भकचोन्हरा
कउआ से दीवान हो गयल।
आगे नाथ न पीछे पगहा
खाय-मोटाय के भइल गदहा
कान के कच्चा मुंह के पदहा
चुगुलहवा दरबान हो गयल
जबसे राजा बनल भकचोन्हरा
कउआ से दीवान हो गयल।
चोर-चोर मौसेरा भाई
घर बेचिके खाय मलाई
बाप ओझा अ डाइन माई
लोकतंत्र त इहां जइसे
बिन मालिक दुकान हो गयल
जबसे राजा बनल भकचोन्हरा
कउआ से दीवान हो गयल।
पेट भयल बा बहुते भारी
खात-खात सब के हिसदारी
उलटे घुमि-घुमि देत बा गारी
आन्हर कानून बिधान हो गयल
जबसे राजा बनल भकचोन्हरा
कउआ से दीवान हो गयल।
--©राम बचन यादव
25/07/2023
